***************************अन्न व औषध प्रशासनाच्या जाणीवपूर्वक दुर्लक्षामुळे राज्यात गुटखाबंदी असताना अणदूर,जळकोट, लोहगाव, सलगरा व नळदुर्ग येथील 5 मोठे गुटखा तस्कर कर्नाटक राज्यातील बसवकल्याण व आळंद येथून प्रतिबंधित गुटखा आणून नळदुर्ग व परिसरातील ग्रामीण भागामध्ये खुलेआम विक्री करून प्रशासनाला एका प्रकारे आव्हान देत आहेत. त्यांच्यावर कारवाई करण्याऐवजी प्रशासन बघ्याची भूमिका घेत असल्यामुळे खरोखरच गुटखाबंदी आहे की केवळ कागदावर हे प्रश्न उपस्थित होत आहे.
************************
त्याचबरोबर नळदुर्ग शहरातील अक्कलकोट रोडसह शहरातील विविध भागांमध्ये व परिसरातील ग्रामीण भागात रसायन मिश्रित हातभट्टी दारू व शिंदीची विक्री मोठ्या प्रमाणात सुरू आहे. त्याच्यावर मोठ्या प्रमाणात कारवाई होणे गरजेचे आहे. त्याचबरोबर राष्ट्रीय महामार्ग लगत असलेल्या हॉटेल्स तसेच धाब्यावर मोठ्या प्रमाणात विनापरवाना देशी- विदेशी दारूची विक्री केली जात आहे. त्यामुळे तरुण पिढी दारुच्या आहारी जाऊन वाया जाण्याच्या वाटे आहे. त्याला केवळ आणि केवळ दारूबंदी विभागाच्या अधिकाऱ्यांच्या जाणीवपूर्वक दुर्लक्षपणा जबाबदार आहे. कारण नळदुर्ग शहर व परिसरामध्ये देशी- विदेशी, हातभट्टी दारूचा बेकायदेशीर साठा ठेवून विक्री करण्याचा धंदा जोमात सुरू आहे. ड्रायडे च्या दिवशी बियर बार बंद असताना मात्र तळीरामांना हॉटेल्स व धाब्यांवर सहज दारु उपलब्ध होते. त्यामुळे राज्य उत्पादन शुल्क चा दारूबंदी विभाग काय करतो असा प्रश्न उपस्थित होतो. आणि हा काम आपला नाही म्हणत सर्व संबंधित विभागातील अधिकारी एकमेकांकडे बोट दाखवून जबाबदारीतून मुक्त होण्याचा प्रयत्न करीत असल्याचे दिसून येते. या हातभट्टी दारूमुळेच सण उत्सवात तरुण मुले दारू पिऊन धिंगाणा घालत आहेत त्यामुळे कायदा व सुव्यवस्थेचे प्रश्न निर्माण होते त्यामुळे असे धंदे कायमचे बंद होणे गरजेचे आहेत.
***********************
नळदुर्ग शहर परिसरातील काही दुकानदार व दलाल गोरगरिबांच्या तोंडाचा घास असलेल्या रेशनिंगच्या गहू तांदळाची काळया बाजारात विक्री करीत आहेत आणि हा शासकीय माल खरेदी करण्यासाठी सोलापूर- वैराग येथील गहू- तांदळाची तस्करी करणारी टोळी सक्रिय झाली आहे. रेशनिंगच्या गहू तांदळाची ओळख पटू नये याकरिता वाहनामध्ये माल भरण्यापूर्वीच व त्यांची अदलाबदल करून राष्ट्रीय महामार्ग क्रमांक 65 सोलापूर- हैदराबाद रोड तसेच नळदुर्ग- तुळजापूर रोड वरून याची खुलेआम बेकायदेशीर वाहतूक केली जात आहे. मात्र याच्यावर कसल्याच प्रकारची ठोस कारवाई का केली जात नाही हे मात्र गुलदस्त्यात आहे. अनेकदा गहू तांदळाचे वाहने तपासणीसाठी अडविले जातात मात्र त्यानंतर शासकीय माल नाही असे सांगून सोडण्यात येते. ती कोणत्या आधारावर सोडली जातात हे देखील गुलदस्त्यात आहे. कारण एखाद्या वाहनामध्ये भरलेला माल हा शासकीय आहे किंवा नाही याची खात्री करण्याकरिता फोर्टी फाईड लॅब टेस्टिंग करणे गरजेचे आहे. ते केली जाते का ? लॅब टेस्टिंगचा रिपोर्ट आल्यानंतरच सहनिशा करून वाहने सोडली जातात का? की चिरीमिरी घेऊन सोडतात हे पहाणे गरजेचे आहे. कारण गहू तांदळाचे काळाबाजार करणारे तस्कर यात सहभागी असलेली स्थानिक दुकानदारांकडून कच्चे ई वे बिल घेतात व दाखवून निघून जातात त्याची देखील सहनिशा करणे गरजेचे आहे आणि याला आळा घालण्यासाठी पुरवठा विभाग व पोलीस शासनाच्या पथकाकडून संयुक्त कारवाई होणे गरजेचे आहे.
***************************
महत्त्वाची बाब म्हणजे मटका, गुटखा,जुगार, हातभट्टी दारू व गहू- तांदळाचा काळाबाजार नळदुर्ग व परिसरातील ग्रामीण भागात सुरू असल्याची माहिती दारूबंदी विभाग, अन्न व औषध प्रशासन, पुरवठा अधिकारी तसेच पोलीस प्रशासनातील काही अधिकाऱ्यांना आहे. मात्र तेरी भी चूप मेरी चूप म्हणत नळदुर्ग शहरातील अवैध धंदे करणाऱ्यांच्या विरोधात कारवाई होत नसल्याने नागरिकांतून नाराजी व्यक्त केली जात आहे व असा प्रश्न उपस्थित केला जात आहे की संबंधित खात्याचे पथक प्रत्येक महिन्यातून एकदा का होईना नळदुर्ग शहरात आलेले दिसतात मात्र ते शहरात कशासाठी येतात ? काय करतात हे गुलदस्त्यात आहे.
*************************
मटका, गुटखा, हातभट्टी दारू व गहू- तांदळाच्या अवैध धंद्यामध्ये गुंड प्रवृत्तीच्या लोकांनी आधीच प्रवेश केला होता मात्र राजकीय क्षेत्रातील व्हाईट कॉलर वाल्या तथाकथित नेत्यांनी अवैध धंद्याच्या माध्यमातून शहरवासीयांना लुटण्याचा धंदा प्रशासनाच्या नाकावर टिचून सुरू केल्यामुळे जनतेचे रक्षकच आर्थिक फायद्यासाठी भक्षक बनले आहेत याला वेळीच पाय बंद करणे गरजेचे आहे अन्यथा भविष्यात अवैद्य धंद्याच्या स्पर्धेतून कायदा व सुव्यवस्थेचा प्रश्न निर्माण होण्याची शक्यता आहे.
************************ नळदुर्ग व परिसरात सुरू असलेल्या अवैध धंद्याची माहिती सर्वच राजकीय पक्षातील नेत्यांना सुद्धा असताना सुद्धा सर्वच राजकीय पक्षाचे नेत्यांनी याकडे जाणीवपूर्वक दुर्लक्ष केले असल्याचे दिसून येत आहे. कारण अवैध धंदे करणाऱ्यांमध्ये काही कार्यकर्त्यांचा समावेश असल्याने सर्वच राजकीय पक्षातील नेत्यांनी या गंभीर विषय कडे जाणीवपूर्वक दुर्लक्ष करून तेरी भी चूप मेरी भी चूप म्हणून मौन धारण केले असल्याचे दिसून येत आहे जे चिंतेचा विषय आहे.
****************************